2007 वर्षे प्रदर्शितः "लाईफ् इन दी मेट्रो" चित्रपटः स्मर्यते किम्? अस्तु, चित्रपटः तु लोकप्रियतां न गतः, किन्तु तस्मिन् पौनःपुन्येन प्रस्तुतः एकः दृश्यः आसीत्, यश्च उपहासस्य विषयः अभवत्। एषः उपहसनीयः दृश्यः एव (कु)ख्यातिं गतः। चित्रपटे यदा यदा कापि हृद्स्पर्शिणी, विघ्नमयी घटना घटति, तदा तदा त्रयः गायकाः आविर्भवन्ति। प्रकटीभूय त्रयः अपि स्वमुखेषु विविधाः भावाभिव्यक्तयः प्रदर्शयन्तः भावुकानि गीतानि उच्चैः गायन्ति। एकः नेत्रे निमील्य, ललाटे वलयान् दर्शयन् नैराश्यं प्रकटयितुं प्रयतमानः गायति, अपरः तु विस्फारिताभ्यां नेत्राभ्यां, अश्रूणि स्रावयन् हृदाघातं प्रदर्शयन् गायति, तृतीयः मनुष्यः शिरश्चालनपुरस्सरं गायन् एकहस्ते गिटारवाद्यं गृह्णन् द्वितीयेन हस्तेन गिटारतन्त्रीः सम्पीडयन् गायन् च स्वोद्वेगं हुङ्कारयति। हृदयद्रावकाः प्रसङ्गाः, भावाभिषिक्तानि सुमधुराणि गीतानि, गायकानां मुखेषु दृश्यमानाः भावमुद्राः एतेषां समवायेन भावसंविलितं वातावरणं निर्मातुं चित्रपटनिर्देशकैः भूरिपरिश्रमाः कृताः। किन्तु अभिनये अननुभविभिः गायकैः प्रकटितैः कृत्रिमभावैः वातावरणस्य गाम्भीर्यमेव नष्ट्वा प्रत्युत हासं जनितम्।