शाटिका आवश्यकी

सुबोधा — ममते ! किं करोति भवती? आगच्छति किम् ?

ममता — कुत्र गच्छसि ?

सुबोधा — एका शाटिका आवश्यकी। भवती अपि आगच्छतु। आपणं गच्छावः।

ममता — किञ्चित् तिष्ठतु। आगच्छामि।

सुबोधा — मम मातुलस्य विवाहः अस्ति। अतः नूतनां शाटिकां क्रीणामि।

ममता — भवती कं वर्णम् इच्छति। भवत्याः नीलः वर्णः युज्यते।

सुबोधा — नैव। नीलवर्णस्य हरितवर्णस्य च शाटिका मम समीपे अस्ति। पाटलवर्णस्य पीतवर्णस्य वा इच्छामि। पश्यामः। तत्र।

ममता — कति रूप्यकाणां शाटिकां स्वीकरोति भवती?

सुबोधा — सामान्यतः त्रिशतरूप्यकाणाम्। ततोऽपि अधिकमूल्यस्य मास्तु। मम माता मम निमित्तम् एकाम् आनयति। सा श्वेतकृष्णवर्णयोः मिश्रिताम् एकां शाटिकां स्वीकृतवती।

ममता — भवत्याः रक्तवर्णस्य शाटिका बहु उत्तमा अस्ति भोः।

सुबोधा — किन्तु अहं तां न इच्छामि। अहं पाटलवर्णस्य पीतवर्णस्य वा शाटिकां बहु इच्छामि।

ममता — अस्तु आपणे याम् इच्छति तां स्वीकरोतु ।