वार्षिकोत्सवः

पुत्री — अम्ब! मम महती बुभुक्षा अस्ति।

माता — सुधे! किमर्थं त्वरा?

पुत्री — अद्य मम विद्यालये वार्षिकोत्सवः अस्ति। तत्र नाटकं, गीतं, नृत्यं, भाषणम् इत्यादयः कार्यक्रमाः सन्ति।

माता — भवती वार्षिकोत्सवे किं करिष्यति?

पुत्री — वृन्दगाने अहम् अस्मि। मम सखी नृत्ये अस्ति। बालकाः केवलं नाटके सन्ति। वयं बालिकाः पुनः यष्टिक्रीडायाम् अपि स्मः। द्वौ बालकौ विनोदनाटके स्तः।

माता — निपुणा खलु मम पुत्री।

सखी — सुधे! कुत्र असि?

पुत्री — अत्र अस्मि। किं? वदतु।

सखी — भवती अद्य कदा विद्यालयं गमिष्यति?

पुत्री — किमर्थम्? भवती अपि गमिष्यति वा?

माता — युवां मिलित्वा कस्मिन्नपि कार्यक्रमे न स्थः वा?

पुत्री — आवां द्वे अपि वृन्दगाने यष्टिक्रीडायां च स्वः।

माता — अद्य कन्यायाः विद्यालये वार्षिकोत्सवः अस्ति। वयं शीघ्रं गत्वा पुरतः उपविशामः।